الشعور بالوحدة دوائه هو الحب

الشعور بالوحدة قاتل


الشعور بالوحدة قاتل


ممكن تكون قاعد مع ناس كتير بس من جواك وحيد

وتتعذب أكتر لما تكون مستنى شخص معين أو حدث معين ويبقى بالنسبة لك هو الدنيا وما فيها وهو الوحيد اللى هيملى حياتك وهيهون عليك لحظات اليأس والوحدة دى

لا والأصعب بقى كمان لما تكون متأكد أن الشخص ده فى نفس الوقت اللى انت محتاجه يؤنس وحدتك بيكون هو مشغول بحد تانى أو حاجة تانية

شعور مؤلم أنك تفضل تنتظر وتنتظر وتنتظر وفى الآخر مايوصلش ومايجيش الشخص المنتظر

شعور مؤلم أنك تنتظر مكالمة من شخص عزيز عليك ولا يتصل وخصوصا لو انت عارف أنه بايده يتصل وبالعكس ممكن يكون بيكلم غيرك دلوقتى

والأصعب و الأصعب أن يكون الشخص ده جرحك أو زعلك وتفضل أنت مستنى أنه يحس بغلطته ومش مهم يعتذر ... كفاية بس يكلمك ويكون حنين معاك .... بس للأسف ولا هو هنا
يمكن يكون مش واخد باله أصلا أنه جرحك وممكن تطلع أنت الغلطان فى الآخر !

احساس مؤلم أن الشخص اللى بتتمنى يسعد حياتك يكون هو سبب تعاستك

احساس مؤلم أنك تعطى وانت فعلا من جواك مش منتظر مقابل وفى النهاية تلاقى نفسك متهم أنك عايش فى دور المضحى وأنك ماعملتش أى حاجة ولا حد حاسس بيك

شعور مؤلم لما تكون هاتموت وتفضفض ومش قادر تعمل ده..... يبقى نفسك بس حد يقولك أنا حاسس بيك ويبقى حاسس بيك بجد


احساس بالحيرة لما أوقات تحس بفتور تجاه شخص كان كل دنيتك .... يمكن يكون ده رد فعل مش فعل ..... وبعدين ترجع تحن لو حسيت بضعفه أو طيبته وتقول نبدأ من جديد ..... وفى ثانية بكلمة أو نظرة منه يهد كل حاجة وترجع تبدأ من الصفر

احساس مؤلم لما تكون عمال تخطط وترسم فى خيالك ازاى هتسعده و تقرب منه وفجأة يفوقك بكلامه وتلاقيك عايش مع نفسك فى الوهم
هو فى وادى وأنت فى وادى تانى خالص

احساس بايخ انك تسمع كلمة حلوة وأنت عارف أن اللى بيقولها مش حاسسها ولا حاجة وبيقولها تأدية واجب وأنت مضطر تعمل مصدق وتضحك فى وشه


وبردو أحساس سخيف أنك تتسول الكلمة الحلوة وممكن جدا فى الآخر بردو ماتلاقيهاش
وصدقنى حتى لو اتقالت مش هيبقى ليها أى طعم بس أنت للأسف بتبقى محتاجها وبتتمنى تطلع من القلب

احساس مؤلم لما حد يمسح بأستيكة من تاريخك معاه أى حاجة حلوة عملتها
وكأن ماكانش بينك حاجة حلوة

احساس بالقهر لما تلاقى أن الناس اللى أنت كل همك رضاهم بيعملوا خاطر وحساب لكل الناس الا أنت !
شايفين كل الناس حلوة الا أنت

ماشيين يدوروا على الحلو عند غيرك ومش عندك أنت

وممكن تكون أنت أحسن من كل دول بس ........


منتهى السخرية أن حد يجرحك باسم الصداقة ولو فكرت بس تختلف مع الصديق المزعوم يكشر عن أنيابه ويقولك : احنا فعلا ماينفعش نبقى أصحاب
كأنه بيمن عليك بصداقته


احساس فظيع بالذنب لما تحس أنك بتغلط وتحاول تقاوم وترجع تانى تغلط

احساس مؤلم لما تحس أن ربنا مش راضى عنك

احساس مؤلم لما تحس أنك بتاخد حاجة مش من حقك

احساس مؤلم لما يختفى أقرب الناس ليك وأنت محتاجهم

صديقك تعرفه لما تكون بس عايز تبقى معاه حتى لو مش هتتكلم بس مجرد وجوده هيحسسك بالأمان ويهون عليك

احساس بالضياع لما أوقات تحس أنك تايه ومش فاهم نفسك